Bernice,
七月中見你單剔左其實就已經知你block左我…但你啲野我一路唔捨得掉，唔知點好。我至今亦有好好保管你件褸同cushion，雖然我知道，你純粹當佢地係垃圾，掉左俾我，要唔要都罷。但如果你收到我呢個message，我下星期一番工會帶埋你啲野，放工六點一島會打俾你，到時我會係金鐘收工，睇下邊度方便你俾番啲野你。我冇諗住再煩你，亦唔會再煩你。
當然，呢個係藉口黎。我好耐以前向你道歉，話我想同你講我點諗，我嗰時其實係自欺欺人。我此時此刻先真真正正同你講我點諗。因為幾個月以黎，我每日做乜都諗起你，好辛苦。我唔會期望你會聽電話，又或者你甚至唔會收到我呢個message，但有好多野我本來想親口講，而家發覺冇機會，唯有打出黎，當自己講左，等自己叫做死左條心，了結左件事佢。
我鐘意你，而且唔係無啦啦，我係第一眼見到你就已經鐘意你。我記得係十月份，我行去影印機影印，平時一向唔望人，眼尾見到有個女仔企係部影印機前面不知所措，我亦不以為然，自己顧自己就算。後尾Rita行過黎問你做咩，原來係jam紙定係冇紙，跟住我一望，先見到原來係你。你好靚。我後悔我冇做任何野。
但後尾都竟然俾我識到你，其實真係好好彩。但我愈鐘意你，我愈要扮冇野。我怕其實你對每個男同事都係咁（而你可能的確係），我怕我表錯情，我怕我煩到你，我怕你會嫌我係屋邨仔，我怕你有男朋友，然後人地見到我同你食飯之後會周圍講令你唔開心，我怕你會覺得我特登搞曖昧，我怕whatsapp set你做Bernice其他同事會見到，所以最後set左你做Ecinreb。我最怕，係你當初拒絕再同我食晏，唔係因為我當日嗰段錄音話我地俾人見到，而係因為你同我食完晏之後就發覺我係一個不但冇外表，仲要內裡極其空洞、毫無內容嘅人。所以我要扮冇野，扮一切如常，扮對你冇特別意思。連你last day嗰日我都唔敢黎同你打個招呼，影番幅相。
我愈鐘意你，就愈憎我自己。
我仲記得我last day前一個禮拜，嗰陣你已經封鎖左我，我提早拎番你啲野番屋企，費事到時last day俾同事見到問我係咩黎。嗰晚我同我大家姐食飯，拎住你袋野。我咁多年黎冇拍過拖，而佢亦咁多年黎從未過問我感情事，但當晚唔知發咩神經，無啦啦問我有冇女朋友。我當時就拎住你袋野。我淨係覺得好諷刺。我好想嗰一刻答佢，我拎住嘅就係我女朋友嘅野。但我唔係你邊個，你已經封鎖左我，而我更加唔知我地係乜野。
之所以咁唔開心，我覺得某程度上都係因為認為自己有啲野曾經可以做到、改變得到。所以，我呢個message用意係，就算你收唔收到、有冇睇到，我都會當你「已讀」：當你「不回」，咁就即係我根本觸動唔到你，純粹係我一廂情願。如果你睇到呢度，淨係覺得好嘔心、好毛管棟，咁你到時千祈唔好聽我電話。唔好俾個機會我再自編自導自演自作多情多次。
最後我想你知，係你嘅出現，令我憤世嫉俗咁多年後，意識到自己已經有幾脫離現實。你令我努力做番一個似樣嘅人。即使一切已經太遲，但我就算只係你生命裏嘅過客，你依然會係我心目中永遠嘅畫中曇花。
Terry
沒有留言:
發佈留言